طريقه اخفاء الهالات السودا والتصبغات بالميك اب♡!

السلام عليكم ورحمه الله ♥
الهالات السودا اغلبنا نعاني منها اسبابها كثيره وطرق علاجها كثيره بس من اهم طرق علاجها النوم
والترطيب وعن تجربه ♥


من جد خفت معايا ، المهم بالميك اب نقدر نخفيها بخطوات بسيطه بس الغالب يشتكي انها تقلب 
رمادي او ممكن تخفيها بس ماتكون المنطقه منوره  ونظيفه.
دايم احب اجرب منتجات وطرق قبل فتره كان ليا موعد مع خبيره ميك اب من ماك وعلمتني طريقه 
ومن جد اعتمدتها وفرق معايا بشكل كبير ♥!

جا ببالي فكره اني اطبق عليكم الخطوات علشان توصلكم اكثر فرسمت على ايدي بكحل بني ودمجته ويكون
التطبيق عليها ونفس الخطوات تقدري تطبقيها على اماكن التصبغات لو عندك .

اول خطوه ومهمه جدا هي ترطيب المنطقه تحت العين هذي راح تساعد انو الميك اب مايخطط معاك ويحافظ 
على بشرتك بنفس الوقت♥ .
اللي استخدمه من كيلز بالافوكادو جميل جدا وحكيت عنه بمفضلاتي♥ هنا قبل فتره حكت عنه حنان النجاده 
انه من افضل كريمات تحت العين بالذات قبل الميك اب لاان من مميزاته يعطي زي الاضاءه او الاناره تحت العين 
وبجد يعطي انعكاس يخفف من حدتها .

حطيته على المنطقه الغامقه وشايفين كيف اضائته قويه ويعكس وبعد هالخطوه احب اوزع الفاونديشين
حتى تحت العين .

الخطوه الثانيه او ممكن تكون الثالثه يعني قبل الفاونديشين او بعد ماتفرق ، المهم الخطوه هذي هي اهم خطوه
اللي هي المصحح انا استخدم من ماك ستوديو كونسيل اند كوركت دو رائع جدا♥، حتى الميك اب ارتست نوره
بو عوض تنصح فيه ويستاهل واكثر شي يعجبني فيه انه يجمع المصحح الاورنج والاصفر ، متوفر منه
درجات كثيره حاولت اطلع الدرجه اللي عندي للاسف مو واضح ، سعره اذكر بحدود ال ١٥٠ .

اول شي تبدأي بالمصحح الاورنج فايدته انه يكسرلك ويمحيلك اللون الاسود او البني ومايخليه يقلب على رمادي
بس ابدا لاتكثري لاان اللون قوي وغني فكميه بسيطه تغنيك .

بفرشه فلات اف ٨٠ الحجم الصغير دمجت المصحح وتقدري تستخدمي بيوتي بليندر او اصباعك او
اي فرشه صغيره للمنتجات الكريميه ، شايفين النتيجه كيف اورنج واضح وقوي !

بعدها تجي الخطوه الثانيه من المصحح اللون الاصفر اللون هذا راح يخفف من حدة اللون الاورنج وبنفس الوقت
اللون الاصفر راح ينورلك ويصفيلك المنطقه اصلا ممكن تستخدمي بااماكن اللي تبغي تسويلها هاي لايت قبل
الهاي لايت راح يضاعفلك النتيجه .
ممكن لو انتي هالاتك خفيفه تستخدمي مصحح بدرجه مشمشي تغنيك عن الخطوتين لاان لو تلاحظو بعد دمج الدرجتين نوصل للمشمشي ، بس لو هالاتك غامقه جدا افضل يكون منفصلين اللونين علشان تتحكمي بالدرجه .

الخطوه الثالثه الكونسيلر ، كثير بنات يقولو يقلب رمادي هو غالبا يكون السبب ان الهالات غامقه ولون 
الكونسيلر فاتح فيقلب معاك ! البعض ماعندها هالات ويقلب رمادي السبب غالبا انها اخذت درجه فاتحه عليها ،
الافضل الكونسيلر تاخذي نفس درجتك او افتح بدرجه بالكثير بدرجتين ، الكونسيلر عمله يخفي العيوب
بس مايفتحلك ولا ينور المنطقه .

استخدمت كونسيلر اتش دي من ميك اب فور ايفر اول مرا اجربه واستخدمت بيوتي بليندر من جهه البوز لدمجه لاحظت سريع الدمج .

هذي النتيجه بعد الكونسيلر اللون البني تغطى والكونسيلر تغطيته عاليه بس ماادري عن ثباته كيف للان
ولا اعرف هل يخطط او لا .

هذي الخطوه اللي اغلب البنات تلخبط بينها وبين الكونسيلر ، هي خطوه الاضاءه تحت العين تستخدمي لون فاتح
بعد الكونسيلر ماراح يقلب معاك ان شاء الله انا احب حق ديور اسمه سكين فلاش تستخدمه حنان النجاده غالبا
بس مخلص استخدمت حق سان لوران كويس بس ديور افضل وانا لاان ماعندي هالات قويه استخدم المصحح
بعدين الفاونديشين واستغني عن الكونسيلر واحط هالاضاءه وجدا النتيجه رائعه .

هذي نتيجه الاضاءه شايفين كيف فتح ونور المنطقه♥ .

بعدها نجد لخطوه التثبيت احب استخدم بادور تكون مايله للاصفر تناسب بشرتي وتعطي اضاءه للمنطقه ،
عندي لورا مارسيه بس احب اللي بكنتور انستازيا اكثر وممكن تستخدمي بودره شفافه راح تثبتلك بس بدون اضاءه .

هذي النتيجه بعد الباودر تغطيه كامله للون البني ولا قلب رمادي بالعكس النتيجه اللون موحد وقطعه وحده♥ ،
مافي اي اثر للخطوات اللي قبل بالعكس النتيجه نظيفه وتغطيه عاليه♥♥ .

وهذي طريقتي ان شاء الله انكم تستفيدو منها واذا طبقتوها قولولي♥ بالنسبه للمنتجات مو لازم تلتزمي بنفسها بالعكس حاولي تستخدمي اللي عندك بس جيبي اللي ناقصك ♥.. وكالعاده احبكم جميلاتي ♥

 ♡♡

     Twitter | Instagram | Bloglovin