مفضلاتي لشهر Jan / Feb /March ♡♡

 السلام عليكم ورحمه الله وبركاته ♥♥
من زمان مانزلت مفضلاتي ولااني زي ماعودتكم المنتج احب اجربه لفتره طوويله علشان اتاكد اني بجد حابتو  ومن جد من مفضلاتي♥

انا انسانه اعاني من تشقق الشفايف داايم ودايم اجرب مرطبات كل ماطلع شي جديد واستخدم مقشر شفايف بس
ماوصلت لشي اللي بجد فرق معايا الا لمى استخدمت هالجميلين ،
- فليكسويل "يارب اسمو صح ههههه" اول ماجربتو كان اوك وحلو بس ماحسيت بتغيير كبير وبعد فتره حطيتو
عند راسي استخدمو يوميا قبل النوم كعلاج مع الاستمرار لاحظت تغيير عجيب بشفايفي وتاكدت انو منو للامانه حتى لونها
فتح وسار وردي اكثر بس يبغاله استمرار .. من صيدليه بوتس هنا دايم مخلص لقيتو بدبي .
- ديور اسمو ديور ليب جلو هذا العشق الثاني♥ احب استخدمو خلال اليوم لاانو يرطب بشكل جميل ويعبي خطوط
وتشققات الشفايف ويوردها بشكل طبيعي جدا جميل . وكمان قبل مااحط ميك اب احب استخدمو اخذتو من الطياره
مع جلوس عليهم عرض ناسيه السعر بس برضو تلاقو بسيفورا و وجوه والمحلات هذي .
يعني الاثنين هذولا واحد علاجي وثاني خلال اليوم مع الاستمرار بجد شوفت فرق معاهم ♥♥

كريم مرطب تحت العين من كيلز بالافوكادو♥ بصراحه مع الاستمرار شوفت نتيجه جدا جميله عارفين العاده تحسو
المنطقه اللي تحت العين محدده وفرق بينها وبين الخدود ماتحسوهم كذا قطعه وحده "تشبيهي هههههه" المهم اللي
لاحظتو انو تحت العين جدا ترطب وسار اكثر نضاره ونفس لون خدودي بس النتيجه هذي لقيتها بعد استمرار
سعرو 150 درهم من محلهم بدبي .

مقشر فرانك الاوريجنال♥♥ من اجمل المقشرات اللي جربتها احب النتيجه اللي اعطاني هيا نعومه وترطيب والاجمل انها تستمر
معاك ليومين او ثلاثه .. اريج اختي مو من النوع اللي تحب تحوس وتجرب زي المهم اصريت عليها تجربو وانبهرت هههههه
وقتها تاكدت انو بجد جمييل  قريب راح اكتب عنه ريفيو بالتفصيل بس استمر عليه اكثر واجرب الانواع الثانيه ان شاء الله .. طلبتو من موقعهم.

الوقت اللي استخدمت فيه فرانك وكنت مركزه على منطقه الفخذ والورك وصلني هالمنتج من شركه فيرونا لشد الفخذ والورك فااستخدمتو مع فرانك باانتظام وحتى لو مااستخدمت فرانك المهم اني ركزت على المنطقه طبعا ماشد المنطقه
لاان مستحيل كريم لوحدو بدون رياضه يشد .. بس حبيتو لاانو منتج مخصص لهالمنطقه والعاده انا مااحب استخدم اشياء
معطره وقويه لهالمنطقه لاانها تسمرها المهم اللي لاحظتو ترطيبو جدا جميل وريحتو حلوه ومايدبق وبسرعه تمتصو
البشره وترطيبه يستمر يوم كامل وبجد لاحظت المنطقه انعم وارطب وافتح وتقريبا مخلص بس راح اشتري منو ان شاء الله
لااني بجد حبيت انو في منتج مخصص لهالمنطقه وبريحه حلوه وسهل الاستخدام♥♥ سعرو بحدود 45 ريال متوفر
بصيدليات الجميله والاستشاريه واضواء الصحه وقريبا واحه العلاج .
بس زي ماقولت استخدمتو مع مقشر يعني لازم تقشير + ترطيب وتلاقي نتيجه ان شاء الله ♥

بودي ميست من فيكتوريا سيكرت مااعرف اسمو قلبتو يمين يسار مو مكتوب شي !! اسمو ابو فيونكه هههههه

ريحتو فروتي شويا على حاجه فريش ماادري مااعرف اوصف كالعاده :$

فرشه الشعر ذا ويت برش اللي هيا تقدري تمشطي شعرك فيها سواء رطب او جاف من جد حبيتها وادورها مااحب استخدم

غيرها .. من صيدليه وايتس .

مفضلات الميك اب :

- بلاشر desert rose من ماك اللون بالعلبه لو شوفتو مستحيل اخذو فكويس هما ارسلو ليا ههههه دايم دايم بالبلاشرات

اختياراتي بينك وفواتح مااحب اغامر بالغوامق بس بعد هذا وبلشينج روز من ايلف غيرت نظرتي المهم اللون جدا جميل

وناسبني وحبيت ثباتو بصراحه ♥♥ .

- مسكره الحواجب من بنفيت درجه ميديم ديب احبها فرشتها جدا صغيره يسهل انك تتحكمي فيها بسهوله و بنفس الوقت

تصبغ الحواجب وثباتها جيد ♥ .

- ليب لاينر من ماك درجه سبايس بااختصار كلنا ندور على ليب لاينر اللي يكبر الشفايف ويبين طبيعي هذي الدرجه اعطتني

هالنتيجه ناسبني جدا استخدمو وبعدو اي روج كذا بينك او لحمي نتيجه جدا جميله♥♥ .

- كحل نود = بيج من ريميل بجد اجمل كحل بيج استخدمتو رااائع ♥♥ احب فيه انو مطفي ولونو جدا جميل طبيعي وافضل شي

فيه ثباتو ! ارجع من برا لسى موجود وبشكل مرتب !! بجد حمسني اجرب الوان ثانيه منهم ♥ اخذتو من درج ستور سعرو

شي ٣ دولار تقريبا .

انبسط اذا شاركتوني تجاربكم مع المنتجات سواء حبيتوها او لا .. وتذكري اللي يناسبني ممكن مايناسبك والعكس .

احبكم جميلاتي ♥

♡♡

Twitter | Instagram | Bloglovin | Ask