راي بمنتجات خلصتها #٣

السلام عليكم ورحمه الله♥
منتجات خلصتها هل برجع اشتريها الجزء #٣  احب هذي المواضيع لاانها تعطي الخلاصه البوست طويل نبدا♥

وقت حملي كنت استخدم مرطبات للكرشه علشان علامات التمدد ماتطلع بس طلع كم خطيط ههههه :(
من اليمين موذر بالم من شركه اخذته من دبي البراند منتجاتها طبيعيه فتحمست بالذات وقت الحمل افضل شي منتجات تكون طبيعيه وامنه البالم ثقيله وشي طبيعي لاانها زبده بس مع المد والحرار تقلب زيتيه وبسرعه 
تتوزع ريحتها مقبوله وترطيبها عالي جيده بصراحه وبرجع اشتريها♥
بايو اويل هالمنتج كثر الكلام حوله عن نفسي مااستخدمه الا كمرطب كنت احبه وقت الحمل ارطب فيه اذا بطلع لاانه خفيف نوعا ما وريحته خفيفه كمان فعملي وقت الطلعه .
اللي بعده سترتش ماركس كريم بااخر حملي فجأه جاتني حكه وحرار بالكرشه هذا كان بارد عليها وترطيبه جيد .
اخر واحد من بالمرز يالله هالمنتج ماقدرت احبو لا هوا ولا النوع الثاني الزبده ريحتو مررا ماحبيتها ماادري صدق مو حلوه ولا مع الحمل كنت اشمها سيئه فماكنت استخدمه كثير :$

اليمين مرطب فازلين عادي مااذكر كان فيه شي مميز .
اليسار دوبي انتبه بالصوره مكتوب بيبي !! هههههه نفس فازلين ماكان فيه شي مميز ، 
اثنينهم مرطبات عاديه بس هالنوع من المرطبات العمليه احب تكون موجوده عندي بالايام اللي مااحب احط كريمات بعطور قويه او ترطيب بنص اليوم .

مقشرات الجسم احب هالنوع العملي خفيفه وتقشير سريع من اليمين
من ماركه بوتس اخذته ب ٥ درهم وحبيتو ريحتو فراوله ومنعش ويرطب♥ يعني ع السعر كويس لو لقيتو بهالسعر راح اشتري اليسار سن من باث اند بودي ماحبيتو ثقيل لين يطلع وحتى بالاستخدام ماراح ارجع اشتري هالنوع من باث اند بودي .

نفس الشي شاور جيل بحبيات مقشره من كوتاج لطيف بس كتقشير ابدا مايقشر لاانو نااعم وحبيباته جدا خفيفه وبسرعه تمشي مع المويا ريحته باللافندر مو مرا مع هالريحه احس لو ريحه ثانيه احبها بيكون حلو كااستخدام يومي لاان فيه نسبه ترطيب .

مقشر الجسم ماركه طبيعيه نسيت اسمها تنباع بمحل ليفينج المقشر جدا عادي اصلا من ريحتو ومكوناته حسيت اقدر انا اسوي بنفسي بالبيت ! لازم استخدم كميه كبيره منه لاانه ثقيل ومتماسك ويطيح عليك ماادري كيف اوصف بس ماراح ارجع اشتري .

للابد كل بوست منتجات خلصتها يكون ديويورنت لويس ويدمر موجود احس خلاص ماحتكلم عنو حفظتو ههههه.
بودره دهن العود من اجمل كمان حكيت عنها كثير بس ارجع اقول بودره بطله بعد المزيل اذا نشف ريحتها تجنن ولا سمرت المنطقه ولاشي وسعرها ١٥ ريال فقط وقد اشتريت جديده ♥.

كبيوتي بلوجر الميك اب نادرا ارجع اشتري لااني دايم ينزل الاجدد والافضل واحب اجرب علشان اقلكم تجربتي
من اليمين اي لاينر ذا بالم جميل سواد واستخدامه عملي ، الوسط بي بي كريم من سماش بوكس جميل وطبيعي تكلمت عنه هنا ،
اخر شي فاونديشين ميك اب فور ايفر اتش دي كمان تكلمت عنه هنا قبل جميل تغطيه متوسطه وطبيعي جدا ع البشره من افضل الفاونديشين اللي جربتهم♥

من اليمين غسول للوجه من اورينجس ثقيل قوامه زي المعجون وكمان حار ينظف كويس الوجه بس لاانه ثقيل احد استخدمه مع الكلاراسونيك تحركه الفرشه بس تنظيفه عميق بس ماينفع يومي .
اليسار مرطب الوجه اورنج دايلي جمميل جدا هالمرطب خفف بس يرطب ينفع قبل الميك اب ويناسب اللي بشراتهم دهنيه لااني زي ماقولت خفيف وتتشربه البشره بسرعه وماتحسو طبقه اصلا تحسي شي خفيف مررا ♥.

من اليمين بودي سوفليه من لورا مارسيه كتبت ريفيو عنها هنا جميله ولو نزلو روائح جميله تعجبني اكيد راح ارجع اشتري♥♥
الوسط مرطب لليد كوري كان جيد وقت استخدامه بس تركتو رجعت يدي زي ماهيا
اخر شي مرطب للرجل من بوتس نفس الشي وقت الاستخدام جيد بس تتركي يرجع كل شي زي اول !

من اليمين زيت الافوكادو من اي هيرب ترطيبه عالي وتمتصه البشره بسرعه وتقريبا ماله ريحه ومايدبق كان من مفضلاتي واشتريت علبه جديده منه رائع بالذات بالشتا استخدمه قبل النوم اصحى الاقي بشرتي مترطبه بشكل جميل ومده ترطيبه تطول
صابون سائل خاص بالبيوتي بليندر كنت اقول تنظيقها عن طريق الصابون الصلب كافي بس هالصابون طلع بلاوي!
بس احس ممكن استخدم صابون سائل زي ديتول وكمان في طريقه تنظيف البيوتي بليندر بالمايكرويف يعني مو منتج ضروري ومايستغنى عنه هذا عينه ولا اشتريته .

لصقات كريست ،، طبعا كلنا سمعنا المدح اللي عليها وقررت اجربها روحت اشتريتها ب ٣٠٠ ريال تقريبا رجعت البيت فكيتها لقيت ٤ اكياس فيها يعني حق ٤ مرات بس !! 
المهم واقرا المعلومات عليها تستخدمي كل شريط مده ساعه اي وقت حابه تبيضي المهم جربتها ماشوفت هذيك النتيجه اللي تذكر ومؤقته !! صراحه كانت صدمه ليا بس احكي لصاحباتي طلع في انواع كثيره افضلها اللي ٢٤ كيسه كورس كامل بجد شوفت نتيجتها عليهم جدا بطله وهم كملو ١٢ بس !
والسعر تقريبا بهالحدود او ارخص طالبينها اون لاين "انا اخذتها من وايتس" نصيحه لو بتاخذي خذي شي كورس طويل وكمان اون لاين لاان السعر جدا يفرق وانتبهي للنوع اللي تطلبي في شي للاسنان الحساسه والكورسات تختلف .

♡♡

Twitter | Instagram | Bloglovin