مشترياتي : زارا ، اسوس ، ديور ... ♥♥

السلام عليكم ورحمه الله
عارفين الوحده بعد الولاده المقاس يتغيتر !! ههه ولازم تشترتي من جديد فمشترياتي كانت الاكياس تتجمع بمكتبي فجا
ببالي اخليها لااخر رمضان واصورها وانزلكم هيا زي ماطلبتو♥ .. المشتريات شي من اسواقنا وفي اون لاين وطويله فيلا نبدا ♥♥

كيمونو من نيولوك حبيت التطريز اللي عليه ناعم وخفيف♥ سعره حدود ال ١٥٠ امكن :/

قميص مو شيفون لا اثقل حبيت لونو وطبعات الورد اللي عليها حلوه للطلعات الخفيفه وبالبيت من سترادفايروس ب ٩٩

فستان قطني حبيت انو بكم و طويل ب ١١٩ من زارا .

كارديغان او سديري ماادري ينضم لااي فئه هههه حبيتو فوق الفستان اللي فوق اخذتو من بيرشكا ب ١٤٩.

من موضه هالسنه الشيرت دريس اللي هوا فستان بشكل قميص اخذتو من زارا ب ١٩٩حبيت الازارير الذهبيه اللي فيه
واتخيلو مع ستيتمنت نيكلس يطلع اجمل بس قماشو حبيتو وماحبيتو حلو خفيف بس بنفس الوقت يتكرمش بسرعه :/

توب انا اعتبرو بدي بس كروب مرررا حبيت خامتو♥ احسو قطعه كلاسيك حلو تكون بالدولاب ب ٧٩ من زارا .

كيب بلايزر جدااا جميل♥♥ نزلتو بالسناب وانا لابستو وكثيير جاتني اسئله عليه من فورايفر٢١ ب ١٨٩ اتوقع

كروب توب وعليه شغل بالترتر من فورايفر ٢١ ماراح البسو قطعه واضحه لا احب اللي زي كذا تكون تحت بلايزر ب ٨٩ .

فساتين قطنيه ناعمه وحلو طولها افكر البس عليها الكومينو او السديري راح يغيرها ويحليها كثيير الازرق من زارا ب ١٩٩

والاسود من فورايفر ٢١ ب ٥٥

كروب توب وتنوره جدااا جميلين وفخمين يعني يلبسو لمناسبات كبيره بالبيت او زي الملكه .. من فيمي ناين قالولي اختاري

من عندنا وهذولا كانو اختياري القطعه الوحده بحدود ال٢٠٠ ريال .

من اليمين جينز من فورايفر٢١ ب ١٢٩واللي بعدو بنطلون اصفر من زارا امكن ب ١٨٠ شي زي كذا :$ واخر واحد جيجنز

من سوت بلانكو من قبل عندي واحد منهم يالله جميييل كرفتو وزي ماهوا وجدا مريح♥ ب ٩٩ .

بيجامه العيد♥ حبيتها ورد وكذا من اوشيو ب ٢٢٠ تقريبا .

نيجي لطلبيتي من موقع اسوس بصراحه هالسنه ماكان زي العام يعني العام كل القطع عجبتني وخاماتها تجنن واغلبها

بالطبيعه احلى من الصور بس هالسنه غير :/ وكثير متابعاتي قالولي نفس الكلام ! المهم دحين وانا اكتب البوست لقيتهم

مسوين خصم على بعض القطع اصلا عادي هههههه :"( فاللي حابه فرصه .

قميص هذا امكن من اكثر القطع اللي عجبتني♥ عليها كرستالات بشكل ورد مرا حلوه وراقيه بنفس الوقت رابطها هنا .

كلنا عارفين موضه الفيست هالسنه وحبيتها طلبت هذا على اساس الصوره هنا بس يختلف بالواقع قماشتو خفيفه وبنفس

الوقت شوفو قصتو جايه حرف ال A مو الواقف :$ حلو بس مو زي اللي ببالي .

كروب توب اوف شولدر مرررا جميل بس تخيلو البطانه الداخليه بس من قدام الخلف مافي !! حاجه خلتني اتعلم اشوف

صور كل القطعه ثاني مرا هههههه هنا رابطها .

بينسل سكيرت مرا احبها ودايم اكرفهم طولهم حلو وتتلبس بمناسبات كثيره .. الكحليه فيها حركه زي اللف من زارا ب ٦٩

والرماديه من اسوس هنا رابطها .

البلوزه الخمه ! ههههه صدق انخميت فيها حابتها وموديلها جميل وغريب بس شوفو صورتها هنا ع الموديل مبينه مرا احلى

خامتها اثقل واجمل ماحبيت كمان الهدب فيها طويل مرا بس افكر اقصرو واخيط عليها تنوره سكيني ابيض بتطلع جدااا جميله 

بطبق واوريكم النتيجه هنا رابطها .

اجمممل قطعه بالطلبيه كلها♥♥♥ فلات اتعب وانا اقول جميل باللبس نزلتو بالسناب وكثيير سالو عنو هنا رابطو انا البس مقاس

37 وهالمره طلبت مقاس 4 وطلع مظبوط الحمد لله .

فلات بطبعه بايثون بينك وبلمعه مرررا جميل باللبس وغريب هنا رابطو 

قبه او ماادري ايش تسموها تتركب على اي توب مررا حبيتها♥♥ غريبه وتفاصيلها مرررا حلوه هنا رابطها .

الحب الجديد♥♥ كعب فالنتينو من زمان حابتو بس كنت متوقعه يكون واسع على رجلي لاانها نحيفه بس روحت اجربو واشوفو

بس لبستو حبيييتووو♥ صدق باللبس مررا يجنن وحبيت اغير عن اللي عندي اغلبها كذا كلاسيك قولت ناخذ حاجه جريئه

وتنفع مع الجينز وعلشان كذا اخذتو اسود .. اخذتو من بوتيكهم بالمملكه سعرو 4 الاف تقريبا .

بروش من شانيل من زمان ادور على شي يعجبني وحبيت هذا مرا اخذتو من فتره قبل اولد.. حبيتو زي خاتمي اللي ضيعتو :"(

احب هاللون من شانيل اللي ماهو فضي ولا هوا ذهبي فينفع مع الاثنين♥ من بوتيكهم بالمملكه ب 1700 تقريبا .

اسواره ذهب ناعمه من محل بابا الاسواره بحدود الالفين والخاتم من محل ذهب جمبو مااعرف سعرو للاسف :$

عوده من هند للعود بحدود ال ٤٠٠ ريال اسمها سيوفي حلوه بس توقعت ثباتها اعلى من كذا .

مسك الطهاره من عبدالصمد القرشي جدا جميل سعرو ناسيه كم بالظبط افتكر كان عليه عرض بحدود ال ٢٧٠ امكن .

عوده من الشرهان مااعرف سعرها هديه ♥

عطور العيد اتوقع شوفتوها بالانستجرام نزلتها بالتفصيل حبيتهم مرا الاول للمناسبات الكبيره والثاني حق العروسه 

للمناسبات الاقل وبالبيت .. كان واحد هديه من البوتيك والثاني اشتريتو بس ماافتكر السعر مو انا اللي حاسبت :| 

ماي نيو بيبي ميني الليدي ديور♥♥ تخيلو الليدي ديور من الشنط اللي حاولو كثير يقنعوني فيها قبل شانيل كنت اقول حلوه

اوك بس حق عمر اكبر وحاطه ببالي اذا كبرت اجيبها بااذن الله بس طلعو منها الميني حبييتتهااا مرا♥♥ انا الشنط الميني

مو كلهم حبيتهم بعضهم احسهم لعبه بس هذي حبيتها على صغرها الا انو فيها رقي الليدي ديور♥♥ من بوتيكم بالمملكه .

ان شاء الله استمتعو بالبوست والبوست مو للعرض بالعكس للافاده والالهام وانا انسانه احب مواضيع

المشتريات ولاحظت انتو زي لاانكم من زمان تطالبوني ومستنين البوست♥♥

كثير تجيني اسئله عن وسيطات ثقه يعني احد يطلبلكم من المواقع ويكون ثقه هذي وسيطه ثقه بااذن الله هنا حسابها 

وكالعاده احبكم جميلاتي ♥

♡♡

Twitter | Instagram | Bloglovin | Ask