مشتريات سيفورا امريكا ♥♡

السلام عليكم ورحمه الله 
بنت خالتي كانت جايه من امريكا وقالت مين يبغى اشياء من سيفورا بالبدايه ماتحمست وبعدين فتحت موقعهم وجلست
اتفرج وكذا اخرتها اشتريت هذا كله ! هههههه بصراحه دحين عرفت الفرق بين سيفورا عندهم وهنا اكثر شي لاحظتو
انو عندهم ماركات عنايه بالبشره والشعر كثيره بالعكس عندنا ميك اب وعطور بس !

كنت مو عارفه ايش اخذ ففتحت البيست سيلر عندهم وشوفت ايش محتاجه واللي جذبني بحثت عنه واذا حبيت الريفيوز
اخذتو وكمان انتو جميلاتي رشحتولي منتجات بالسناب تشات فشكرررا لكم ♥♥ بس للاسف هاي لاتير بيكا تبع جاكلين هيل
كان سولد اوت ب ٣ فروع لهم !!

اول منتج جا ببالي اطلبه من كثر المدح عليه باليوتيوب !! ذا هيلثي ديودرنت اخذت بريحه الفانيلا بنت خالتي جابت سايز
السفر صغنوني بس حلو نجرب اذا كان جيد جبنا حجم كبير هذا سعرو ٨ دولار .

مرطب شفايف شوجر من فريش عندهم نكهات والوان كثييره تحتاري اخذت ع نود / بني تغيير عن البينك ودرجاته 
سعره ٢٢.٥٠ دولار .

فيرست ايد بيوتي براند مافي يوتيوبر ماتكلمت عنها ومنتجاتهم كثيره اخذت اللي كان بيست سيلر هوا الترا ريبير كريم 
قريت وصفو مرطب ويجدد البشره لكل الجسم والوجه حبيت هالشي لااني محتاجه شي زي كذا سعره ٢٠ دولار .

غسول يومي ماركه مراد تكملت عنه اليوتيوبر دلال الدوب من وصفها عرفت انو المنتج اللي احتاجه الغسول رغوه ويشيل
الدهون فبالظبط احتاج زي كذا بالصباح لااني مااحب غسول بالصباح لااني اكون قد سويت بالليل وبنفس الوقت تتجمع
شويه دهون بالوجه مع النوم فهذا حلو خفيييف جدا وبنفس الوقت يشيل الدهن .. سعره ٣٠ دولار .

لونا سليبنج نايت اويل من سن داي رايلي اكثر منتج جذبني هوا زيت للوجه قبل النوم بس مو زيت عادي لا يجدد البشره
يصغر المسام ويسوي اشياء كثيره "صورتلكم العلبه للي حابه تقرا عنه مبدئيا" قريت عنو ريفيوز كثيره في ناس مرا حبوه
ويمدحو وناس كان عادي هوا قوي حتى ماتستخدمي لو كنتي حامل ! عندهم سيروم للوجه جود جينز تمنيت طلبتو كمان
لاانو عليه مدح مو طبيعي ! الطبيه الجايه ان شاء الله .. هذا سعرو ١٠٥ دولار و بااذن الله راح اسوي عنه ريفيو .

منتجات الشعر كانت اخر شي بحثت عنها ومافي وقت ولا عندهم كثير منتجات تحمس بالذات بستايلنج الشعر 
من اليمين بخاخ مكثف للشعر من بمبل اند بمبل شوفت وحده باليوتيوب تستخدمو وحبيت النتيجه بس ماادري عن الثبات
الجديد فيه انك تبخي ع الشعر كله مو جذور بس سعره ٣٠ دولار .
المنتج الثاني دونت بلو اي من بمبل اند بمبل  كريم للشعر كاتبين انو تحطي ويغنيك عن اجهزه التصفيف سعره ٣٠ دولار .

ستينج باودر من لورا مارسيه هذي اخذتها من مدحكم هيا باودر شفافه لتثبيت الفاونديشين سعرها ٣٧ دولار .

اي لانير كات فون دي هذي البراند اتوقع راح تضرب بالفتره الجايه ! اسمو تاتو اي لاينر فنتوقع ثبات عالي سعره ٢٤ دولار .

شايفين الجمال♥! اعترف اور جلاس براند الباكجينج والوانها تغري مررا ! انزلو قبل فتره باليت في ٣ الوان بلاشرز جمييل
بس كان اتوقع بفتره الكريسمس .. المهم احترت بالالوان واخذت هذا بلاشر بدرجه ماجيتنا عجبتني الهاي لايترز تبعهم
بس لااني كنت طالبه تبع جاكلين هيل فمااخذت منهم .. سعر البلاشر ٣٥ دولار .

بوكس مفضلات سيفورا من العطور شي اتمنى ينزلو عندنا فكرته بوكس يحطو سيفورا مفضلاتهم من منتجات معينه مثلا عطور او ميك اب او منتجات شعر وكذا بس حق الشعر ترددت فيه لاان حجمها صغير مااقدر احكم عليها بس العطور فكره جدا جميله وتخيلو الاجمل ماكنت ادري عنه انو اذا اخذتو البوكس تجربي العطور اللي يعجبك منهم تاخذي منو حجم كبير ٣٠ مل !! سعر هذا البوكس ٥٨ دولار .

بنت خالتي تفاجات انو تاخذي عطر هديه مع البوكس فقالت احترت سالت الموظفه ايش الافضل مبيعا عندكم منهم قالت 

اليزابيث سميث الابيض واخذتو .

اخر شي منتج فكرته حلوه باند ايد كريمي تحطي قبل تلبسي شوزك وانتي بكرامه علشان مايجرحك جابتو بنت خالتي

مرا تمدحو بس سويت سيرش عليه لقيتو لكم بدرج ستور هنا  الحلو انو مرا صغير ينشال بالشنطه بس ماجربتو لسى .

بكذا خلصت مشترياتي من سيفورا امريكا بصراحه منتجات تحمس ياريت بس يفتحو مجال الطلب اون لاين منهم عندنا

بس فكرت من دحين كل فتره اجمع منتجات واطلب .. لو جربتو شي من المنتجات شاركونا وان شاء الله حبيتو البوست ♥

♡♡

Twitter | Instagram | Bloglovin | Ask