الأحد، 26 أكتوبر، 2014

منتجات خلصتها هل ارجع اشتريها ؟ "لاش"


السلام عليكم ورحمه الله وبركاته 
نكمل المنتجات اللي خلصتها ماادري انكبت عليا هههههه باقي منتجات لاش بقولكم معلومه عن لاش لو جبتي ٥ علب 
فاضيه يعطوكي منتج من عندهم محدد مو انتي تختاري فااختفظي بعلبهم "الاسعار من موقعهم"


امريكان كريم .. هير كوندشينر سعرو  ١٠٦ ريال

هوا تقدري تستخدمي كبلسم للشعر ومرا موظف قالي تقدري تستخدمي كليف اين كوندشينر بس ماادري ماجربت لاانو
مو مكتوب هالشي ع الاستخدام !
ليف ان اللي هوا الكريم اللي يتحط ع الشعر ولا ينغسل .. المهم ريحتو ميلك شيك فانيلا جميييله واحبها بس هوا المنتج
كان عادي واقل من عادي ترطيبو جدا بسيط اطراف شعري جافه ماكان يسوي فيها شي :$
لو وحده حابه ترطيب بسيط وريحه ممكن يناسبها ماراح ارجع اشتري الا اذا ريحتو اغرتني :|


روب روب روب الاسم البايخ هههههه مقشر للجسم سعرو ١٠٢ ريال
مقشر بملح البحر اصلا لو طعمتي بحر بالظبط "لاحد يسال ايش اللي خلاني اطعمو ههههههه" حبوب كبيره جدا وقويه
ماتذوب معاكي بسرعه تقدري تستخدمي على جسمك وهوا ناشف او مبلول عن نفسي حبيت استخدمو وجسمي ناشف
يسوي تقشير اقوى وتفكري كم مرا ماتختفي الحبيبات وكمان النتيجه معايا كانت افضل ،، وهالنقطه حلوه كمان باايام
البرد مااحب اتبلل وبعدين اعمل سكرب حاله تجمد ههههه ! المنتج بطل♥ من افضل مقشرات الجسم اللي قد جربتها
ان شاء الله راح ارجع اشتري 

شامبو اي لوف جوسي سعرو ١٢٢ ريال
شامبو للشعر اللي الفروه دهنيه وباقي الشعر جاف الشامبو حبيتو واتوقع قد نزل بمفضلاتي مرا احب النتيجه
اللي يعطيني هيا ينظف الفروه من غير مايجفف الاطراف ويحسسني بالنظافه الشي اللي خلاني ماارجع اشتري لقيت
بديل له وارخص اللي هوا من ايف روشيه تقريبا متشابهين بس ايف روشيه يجفف شويتين تحتاجي معاه بلسم .

شامبو بيج من لوش سعرو ١٣٨ .
شامبو بااملاح البحر قوي جدا بتنظيف فروه الشعر ويوعدك انو يعطي كثافه .. هالشامبو احبو لو يقولو تختاري منتج 
واحد من لوش اقول بيج!! مااستخدمه يوميا لا بس لو حطيت زيوت بشعري لاانو يشيلها تماما او لو عندي خرجه احب
استخدمو لاانو بجد يعطيني كثافه بسبب انو نظف الفروه تماما فمافيها زيوت اللي تسبب انو الشعر يهبط .
ماما واريج شعورهم دهنيه نصحتهم فيه حبووه جداا علبه ورا علبه منتج راح ارجع اشتري اكيد ان شاء الله .

ببيل جم مقشر شفايف سعرو ٦١ ريال
اول مااشتريتو وجربتو مررا حبيتو وانبسط فيه ونزلتو بمفضلاتي لاانو كان اول مقشر شفايف اجربو فعلشان كذا مرا 
انبسط عليه وحبيتو بس بعدين جربت مقشر الشفايف من ايلف ب ٣ دولار ومررا حبيتو نفس الشي تقريبا !!
كمان حبيت حق ايلف اكثر استخدامو اسهل هذا تاخذي منو وتحطي ممكن نص الكميه تطيح عليكي :$ بس كمنتج
جيد بس احس له بدائل ممكن اللي تسويها بالبيت اللي هيا سكر وزيت زيتون شي زي كذا ماراح ارجع اشتري .

نيجي لهالبوكس الجميييل التغليف لحالو حكايه وابدا مو هوا اللي خلاني اشتري :")
اتوقع كلكم شوفتو الهدايا اللي يسويها لاش وبتغليفاتهم الحلوه حلوه فكرتها لو حابه تجربي كم شي او هديه لوحده تحب
منتجات العنايه كهديه بسيطه بس جميله سعرو بحدود ال ١٥٠ امكن :$ مالقيتها بموقعهم :|

هذي كانت محتوياتها كلها ببيل باث وببيل بار انا ماقد جربتهم ودخلت اشتري احترت مرا اخر شي طفشت واخذت البوكس وقولت اجرب اللي هوا اهم شي اخذ فكره .. صورتو علشان كنت مقرره اسويلكم عنه ريفيو 

معاها كتيب صغير كمان يشرحلك وهذولا المنتجات 

ذا كومفورتر علي كلام البايع انها الافضل ومرا جميله ريحتها سويتي كاندي شي زي كذا المهم جربتها غيرت لون المويا
بالنسبه ليا كااحساس ماحسيت شي !! حتى المويا بالبدايه حسيتها ناعمه بعدين لا ! بعد ماخلصت من الباث وانا اغسل
جسمي كان يحكني :$ ماادري ماارتحت واريج اختي حصل معاها نفس الشي كمان :$ ماادري انتو تجربتكم معاها كذا ؟
بصراحه زعلت لااني اشوف مدح كبير عليهم ! وبرجع اشتري نوع ثاني مازلت مصممه انهم حلوين :|



الباقيين ماجربتهم بتقولو طيب ليه صورتيهم على اساس اسوي ريفيو زي ماقولت عنهم بس سلطان الله يحمي انهبل عليهم
وماقصر معاهم والله دحين جالسه اكتب البوست شاف الصور قالي ماما اشتريتيهم وعيونو مفرصعه !! ههههه 
لمى شوفت سلطان مرا انبسط عليهم فحلوه فكره تجيبي زيها هديه لطفل 

لو عندك سوال تفضلي وان شاء الله استفدتو من تجاربي الشخصيه وتذكري
مو شرط كل اللي يناسبني يناسبك او العكس هيا تجاربي الشخصيه وانتي لك الحريه




هناك 6 تعليقات :

  1. الله يخليلك سلطان

    ردحذف
  2. يعطيك العافيه

    ردحذف
  3. الببل بار اشكالهم تفتح النفس *_*
    أحس حتى لو ماتسوي شي اشتريها عشان اشكالها ههه ♥
    يعطيكي العافية أميرة و الله يخليلك سلطان ♥

    ردحذف
  4. ربي يسعده❤️ماادري ليه للحين ماارتحت ل لش😂اصلا انا عندي عقدة من محلات التدليع ..ما أرتاح إلا بالصابون المغربي من الصيدلية و اخلي ريحة الشاور خياس ارتاح نفسيا 😂

    ردحذف
    الردود
    1. هههههههه خياس !! حرام عليك تظلمي اللي يدخلو بعدك ههههه
      لا عندهم اشياء جميله ومفيده مو دلع بس .

      حذف

Back to Top