تجربتي مع المنتجات الكوريه ♥

السلام عليكم ورحمه الله وبركاته ♥♥
من زمان نفسي اجرب منتجات كوريه احس انها كيوت وعندهم اشياء حلوه بس ماادري ايش اجرب وسالتكم مرا

ونصحتوني بكم شي واخترتهم من متجر لينو  ووصلتني منهم وهما كمان اضافو منتجات منهم علشان اجربها واليوم راح اقلكم راي 
فيها اول شي المتجر هنا حبيتو لاانو يوصف كل منتج بالعربي وطريقه الاستخدام لاان مو كل منتجاتهم مكتوب
عليها بالانجلش :|

ماسك الطماطم اكثر منتج نصحتوني اجربو ومشهور .. اول مرا استخدمتو حسيت بحراره خفيفه وخفت بعد دقايق بعد 
ماشلتو حسيت انو امتص الدهون لدرجه الحبوب اللي تجيك تحت الجلد برزها ليا وهذا الشي اكدلي انو حار وقوي نوعا ما
النتيجه جدا حبيتها♥ حسيت نظف بشرتي من الدهون واعطاني نضاره جميله جدا وامتلاء للخطوط .

من اليسار ماسك بلاك شوجر من سكين فود انا سمعت انو حلو تستخدمي وبعدو ماسك الرز وكنت اسوي كذا
- ماسك السكر الاسود في حبيبات السكر كبيره وكثيره وثقيل نوعا ما تمدي على بشرتك وتسوي مساج و اتركو لمده
ربع ساعه تقريبا حبيتو يشيل تقريبا الجلد الميت فيعطي نعومه وترطيب ونضاره .
- ماسك الرز خفيف وفي حبيبات الرز نفس الطريقه امدو على بشرتي بمساج واتركو لربع ساعه هوا يرطب مرررا فالبشره
الجافه راح تحبو بس انا بالمنطقه العاديه كان جيد بس ماحسيت شي واو اما المنطقه الدهنيه دهنها ليا بزياده :$

انا بجد انتظمت عليهم هالماسكات اللي بجد لاحظتو بشرتي بهالفتره جداا تحسنت ! ! مااقدر احكم من اي واحد منهم 
لااني استخدمتهم كلهم وعارفين فتره الحمل البشره تتعب بس بجد معاهم بشرتي تحسنت المسامات صغرت اللي بالانف
والرؤس السودا جدا خفت بشرتي نضره وجميله ومافيها علامات التعب كنت اقول اذا خلصت حمل حسوي تنظيف بشره
بس بجد اذا استمريت عليهم احس مااحتاج ان شاء الله ♥ 
بس ماسك الرز هوا اللي ماحسيتو مرا لااني زي ماقولت ماحسيت نتيجتو فرقت معايا وكمان يدهن التي زون 
بس لو بفتره بشرتي كانت جافه راح استخدمو .
بس زي ماقولت الانتظام والاستمرار هوا اللي يخليك تشوفي نتيجه ♥

ماسك للشعر التالف .. شعري تالف الاطراف اعطاني ترطيب وسط تقريبا مو عالي وبنفس الوقت مو اللي يدبق بس توقعت
ترطيبه يكون اعلى بصراحه ملمس الشعره ناعمه ورطبه بس النفشه موجوده حبيت فيه ريحتو جميييله وفوااحه تقعد يومين 
جد اتحمس استخدمو اكثر شي علشان الريحه ♥♥.

مزيل للرؤس السودا من على ثلاث خطوات الاولى تفتح المسام والثانيه تشيل الرؤس والاخيره تقفل المسام 
ما شالي الرؤس السودا كلها شال تقريبا ٤٠ بالميه بس .

جل صبار من يستخدم للبشره والشعر وكل شي بصراحه انا مااحب ريحه الصبار فماقدرت استخدمو لبشرتي او جسمي
استخدمتو للشعر كذا احطو قبل الشور ماحسيت بفرق :$ احسو جيد ولا اعطيتو حقو بس انا الريحه عندي تاثر لو مااحبها
تخليني اتجنب المنتج :\

مرطب لليد بالخوخ .. يوعد انو يفتحها وكذا ترطيبه حلو بس يعني حق كم ساعه مو الترطيب العميق استمريت عليه فتره قبل
النوم لاحظت نضاره بيدي ونتيجه جميله بس تركتو رجعت  ايدي زي ماكانت .

قلوسات بصراحه شكلهم كيوت وكذا بس طفولي هيا اللي تحطيها وتعطيك زي اللمعه وترطيب كانت عاديه احسها حلوه

هديه لبنوتات صغار .

الماكرون الكيووت♥♥ من زمان اشوفو عند اليوتيوبر ونفسي فيه ونفس حالتهم استخدمتو كديكور جدا كيووت ترطيبو جيد

الخفيف ع الشفايف حق كم ساعه بس يعجني انو مو من النوع اللي يسوي طبقه وتتقشر لاانو خفيف اصلا .

هذا المنتج زي البي بي كريم والسي سي كريم من تولي مولي فيه نسبه وقايه من الشمس ٣٠ فينفع للنهار

اول شي لونو جدا فاتح اول مااحطو كاانو قناع هههههه بس شويات يبدا ياخذ مع حراره البشره تغطيتو خفيفه لمتوسطه

ويندمج بس برضو فاتح بس مع بودره برونز شي خفيف تمام حلو يعطي نضاره للبشره جدا جميله وينور البشره زي الكوريات

من جد !! بس بعض الاحيان يكتل معايا ولاحظت مايبغالو كميه كثيره اذا حطيت يعني نقطه ممكن تكفي الوجه كامل لو كثرت يكتل ويبهذل .. حلو بس اتمنى لو في درجات منو .

وبس هذي تجربتي مع المنتجات بالنسبه لموقع لينو بجد حبيتو حسيت موقع ثقه وشامل ومتخصصين لكل شي تبع كوريا

وكذا يعني بكل امانه لو افكر بيوم اجرب شي كوري راح اخذ منهم ♥

http://www.lenoshop.com/

وانتو ايش جربتو من منتجات كوريه وكيف كانت تجربتكم ؟ شاركوني بالكومنتس نستفيد كلنا .. واحبكم كالعاده جميلاتي ♥♥

♡♡

Twitter | Instagram | Bloglovin | Ask