منتجات ماناسبتني !

السلام عليكم ورحمه الله ♥
من زمان عن مواضيع البيوتي وبصراحه ليا فتره طويله ماغيرت المنتجات اللي استخدمها وهالسنه مانزلت افضل منتجات

٢٠١٤ لاان مااستخدمت اشياء كثير بسبب حملي ببدايه السنه والحمل دحين عارفين مع الحمل ماتجربي
واشياء كثير نتجنبها .. بس في منتجات جربتها ماناسبتني او ماكانت زي ماتوقعت ومركونه فقولت خليني اكتب عنها
تستفيدو ان شاء الله .. طبعا المنتج اللي ماناسبني ممكن يناسبك والعكس ♥

اول شي منتجات من شانيل .. بودره اسمها "سوفت بريسد باودر" ببساطه ماتسوي شي !! مااحس بااي فرق بعد
مااحطها سواء من التغطيه او اللوك او الثبات عاديه جدا انا كنت ناويه اخذ الثانيه اللي تيجي علبتها عريضه
وفيها نسبه واقي شمس مرا يمدحوها بس اخذت هذي وبصراحه مااستفدت منها ودحين انبهت لااسمها انها مظغوطه
فمفروض انها تسوي تغطيه بس ماشوفت هالشي ابدا ! .

باليت شادو من شانيل فيه اربعه الوان شوفت يوتيوبر تمدحو ومسويا لوك فيه تحمست واكثر شي حمسني درجه اللون

الكورال = المشمشي نادرا نلاقي بباليت وكذا اخذتو انصدمت بالجوده حطيت برايمر واحط طبقه واثنين يبين شي خفيف

واحط كم مرا علشان يبين تمام بس حتى بالنهايه مااحس اعطاني النتيجه الواو !!على سعره ٢٧٠ تقريبا نتوقع نتيجه بطله!

لو اخذت باليت من براند زي اربن ديكاي ولا لوراك افضل بصراحه بمراحل .

بلاشر من تو فايسد من زمان عندي وسايبتو علشان علبتو الجميله ولا هوا شبه جديد لاان اللون تحطي من هنا يختفي
من هنا احسو يتطاير هههههه يختفي نهائي حتى مايبقى اثر بلاشر ولا بقايا ههههه .

شادو من بورجوا قديم تفتكرو ايام ماطلعو بالشادو الجليتر هذا شوفتو وفي حبات صغيييره جليتر اخذتو طلع نفس
اخوه اللي فوق يتطاير احط بالفرشه واجي احطي طبقه ثانيه تجي تنمسح الطبقه الاولى هههه وانا حاطه برايمر قبل !

مسكرا من سيفورا جاتني منهم .. ميزتها انها بفرشتين يعني رموشك تكون بالوسط للامانه شوفتها بالصور تخيلت نتيجه
واو حسيت اووو كذا كل رمشه راح تاخذ حقها وتبين تمام .. بس للاسف طلعت صعبه بالاستخدام جدا مستحيل ماتبقع
على جفني وانا استخدمها فسرت اتجنبها اخاف تخرب الميك اب بااخر نقطه وحتى نتيجتها عموما كانت عاديه بصراحه .

اقلام كحل من كيكو اسمها "سمارت اي بينسل" ذكرت اسمها لاان في انواع كثيره من كيكو بس هالنوع مرا سئ لداخل
العين انسي يبان معاك لون عيدي مره ولا مليون !! لخارج العين عاديه ولازم تعيدي مو اللي كريميه وسلسله لا جافه
وقويه  مرا بس انا قولتلكم اسمها لاان في نوع ثاني عندهم جدااا جميله عكس هذي راح احكي عنها ان شاء الله .

قلم حواجب من جيفنشي اتوقع تكلمت عنو قبل .. المهم ماناسبني هوا يعطي نتيجه زي البودره بس لاانو قلم فماتقدري
تحددي فيه الحواجب بشكل مرتب لا يرسلمك خطوط عريضه وهوا بودري فينتشر زياده مايعطي شكل مرتب نظيف :|

روجين من اليسار ايف سان لوران واليمين ديور قديمين جدا بس سايبتهم لفكره براسي :)
اللي باليسار ايف سان لوران فاشل جدا اللون كان فاتح احطو بالظبط اللي يسوي يحدد وين التشققات بالشفايف
ويقول للناس شوفوها هههههههه وكريمي بزياده وثباتو صفر :\
ديور كان لون فوشي تغطيتو حلوه بس كريمي بزياده ينتشر ويحوس فما كانت تجربتي معاه اللي تحمس اني اجيب
الوان زياده .

سيلك كريم فاونديشين من لورا مارسيه جبتو من مدح اليوتيوبر الاجانب .. ماادري ماحبيتو السبب مني ولا منو ماعرفت السبب
اني ليش ماحبيتو حاولت بااكثر من طريقه كان عادي واقل من عادي الجد احب بشرتي بدونه شكلها اجمل !!
تعرفي لمى تستخدمي فاونديشين تبغي بشرتك تكون افضل معاه سواء من تغطيه او اضاءه او توحيد للون هذا ماحسيت
بااي شي معاه بالعكس احسو كذا طبقه تكتم وجهي وبس هوا ثقيل نوعا ما جربتو على ماما كمان ماحبيت النتيجه
مرات اقول امكن من الدرجه بس انا ماخذتو من دبي والموظفه طابقتو على بشرتي بس ماادري :$

مناكير من اليسار من ماك بصراحه نادر اشوف احد يحب مناكيرات ماك وجربتها عند صاحباتي وماناسبتني تتقشر
بثانيه بس بكولكشن مارلين "تفتكرو؟" املهم اخذتو توقعت بيكون عليه صورتها وكذا يعني الصدق اخذتو علشان بالباكجينج
بس انخميت طلع بالسعوديه بدون صوره ! والمناكير نفسها مازالت تتقشر بسرعه في بنات قالولي استخدمي
بعده توب كوت بس يعني الجد اشتري مناكير بقريب ال ١٠٠ ريال ابغى جوده عاليه مو احط شي بعدو صح ؟
اليمين مناكير من جينفشي فاشل والله انا مااحب اقول عن منتج فاشل لاان دايم اقول يناسب غيري بس هذا عجيب بدقايق
اي حركه يتقشر !! مااذكر قدرت احطو واخرج مسحتو وغيرتو :) .

ماسك للوجه من سوب اند جلوري اسمو ذا فاب بور هوا للمسامات قوامه ثقيل وحار زي المعجون وفي حبيبات توزعي على
الوجه لين تذوب الحبيبات داومت عليه فتره بسيطه مو طويله بس ماحسيت اعطاني نتيجه ملحوظه صح نعومه ونظافه
اللي تلاقيها بعد اي ماسك بس كنتايج جديده ملحوظه لا ماحسيت بشي اللي يخليني اتعلق فيه واداوم عليه .

كريم مرطب من نيفيا مكتوب انو لليد والوجه والجسم استخدمتو ليدي ماحبيتو ماحسيت بااي ترطيب عادي جدا بس غالبا
هالمنتجات التجاريه تكون عاديه لجيده بس هذا كان في شي كذا يحسسني انو مو مرا الشي اللي خلاني اخلي زوجي 
يستخدمو معايا ويجربو كمرطب للوجه "ادري مفتريه اجرب عليه ههههههه" من يومين قلب وجهه وحبوب واحمرار ! 
نتيجه تخوف والله ووقفناه .

بودره للجسم فانيلا بوف من لش .. تكلمت عنها قبل واني اخذتها متوقعه ريحه الفانيلا قويه بس حسيت ريحه اللافندر
اقوى فمو مرا ناسبتني الريحه بس كمنتج كانت عاديه استخدمتها للجسم ماحسيت انها فواحه او شي وكمان استخدمتها
للاندرارمز = الابط بعد الديودرينت= مزيل العرق دايم احب استخدم بودره بعد الديودرنت تكون ريحه لاان اللي استخدمو 
بدون ريحه فالبودره من باب "الاحتياط" وماحسيت تسوي شي بودره "اجمل" اللي تكلمت عنها قبل افضل وفواحه اكثر
بس استخدم هذي بالايام اللي اكون تعبانه بالليل اخذ شور واحطها وانام هاديه تروق بس كمنتج كانت عاديه .

بس هذي تجربتي مع المنتجات بس مايعني ابدا انها فاشله بشكل عام لا ممكن انتي تناسبك وتجيب نتيجه لاان بشراتنا
تختلف وكثير اشياء تختلف ♥♥ وممكن انتو تقولولي طريقه اسويها مع المنتج ويعجبني وتتغير نظرتي له ♥

♡♡

Twitter | Instagram | Bloglovin | Ask