الأحد، 14 يونيو 2015

تجربتي مع فرش ريل تكنيك ♥!

السلام عليكم ورحمه الله 
كثير تجيني اسئله عن الفرش وانواعها وايش الافضل وقد كتبت زمان اول مافتحت البوست ريفيو عن مجموعه الفرش وتنظيفها هنا

بعد سيجما جربت انواع مختلفه وكنت اشوف ريل تكنيك والمدح عليها مقابل سعرها المعقول مقارنه بسيجما اقول لا مستحيل
وبعد فتره جبت مجموعه الوجه اجربها وانبهرت فيها ومن بعدها وان اكل مانزلو مجموعه تقريبا اجيبها 
جد ناسبتني وتقريبا افضل شي ناسبني ومرتاحه عليها وتقريبا اغنتني عن الفرش الباقيه عمليه وحق كرف وسعرها بطل 

من اليمين فرشه الباودر اخذتها لوحدها وبعدها مجموعه الكور كوليكشن زي مااحنا نسميها مجموعه الوجه تحتوي على ٤ فرش مختلفه اصغر وحده بالمجموعه ضايعه مني بس اصلا على قلتها انا كنت استخدمها للارواج لانها حاجه نقطه ! 
بصراحه انا مو من النوع اللي يلتزم بنوع الفرشه يعني مثلا اذا كانت للفاندويشن مايعني مااستخدمها الا لهذا الشي لا بالميك اب
مافي قانون بالعكس استخدمي وجربي براحتك الى توصلي للنتيجه اللي ترضيك 
من اليمين فرشه البودره بديله لحق سيجما الي كملت معايا اكثر من ٦ سنين ومازال الشعر يطيح منها مو معقوله من سيجما
حق ريل تكنيك جدا بطله ولا عمري شوفت شعره طايحه من كل فرشهم
بعدها مجموعه الوجه اول وحده البوفينج برش احب استخدمها لتوزيع الفاونديشين تعطيني نتيجه مقاربه لفرشه اف ٨٠
من سيجما تدمجه بشكل حلو واستخدمها كمان للبلاشر الكريمي لاان حجمها متوسط فماتوزع البلاشر على منطقه كبيره .
اللي بعدها كونتور برش احب استخدمها لتوزيع الكونتور ودمجه وبسبب حجمها الصغير فماينتشر معاك الكونتور بمنطقه
كبيره بالعكس يحدده بشكل مرتب وبعدين ادمجي ووزعي 
اخر وحده بوينتد فاونديشين برش  شعرها بلاستيك ماحبيتها مرا للفاونديشين صغيره فتاخذ وقت معاك وانا كمان مو من محبي
 هالنوع البلاستيكي اللي يكون مخصص للفاونديشين جربت من ماركات كثيره مااحب نتيجتها تكون مخططه وتطولي لين تدمجي كويس بس استخدمتها لتوزيع الكونتور الكريمي بالذات لمنطقه الانف مناسبه لصغرها ونحفها .

مجموعه العين هي اكثر مجموعه ابهرتني مرررا احبها واغلب شي بفرش العين هيا استخدمها 
من فوق ديلوكس كريس برش من اسمها للكريس "المنطقه اللي بوسط الجفن بالطرف يعني اللي تنطبق تقريبا " كبيره وعريضه وشعرها كثير حلوه لدمج الالوان .
واللي بعدها بيس شادو برش هيا اللي جد احبها تشيل الشادو تمام وتوزعه بطريقه ناعمه استخدمها لكل شي توزيع الشادو
ودمجه وكمان شايفين شكلها فالطرف اللي بالمقدمه يخليك تستخدمها كاانها فرشه بينسل فيعني تنفع مدمع العين كمان .
بعدها فرشه الحواجب اللي هيا الفرشه المشطوفه هيا اللي من جد ماحبيتها عريضه وطويله مرا ماناسبتني برسم الحاجب لاانها عريضه فتنفرش مع الرسم زياده :| فماتعطيك نتيجه محدده ماناسبتني .
النحيفه تبع الاي لاينر كنت مستهونه فيها بس جد بطله جدا برسم الاي لاينر الكريمي واقدر اتحكم برسمه الاي لاينر
بسهوله معاها وتنظيفها سهل من بعد الاي لاينر .
اخر وحده اللي هي اكسنت برش  البطله  نحيفه وصغنونه جدا مناسبه للشادو تحت العين عارفين المنطقه صغيره وصعب توصليلها بفرشه عريضه ممكن تحوس كل شي هذي صغيره خططيره وتدمج مااستغني عنها .

مجموعه ليمتيد اديشن بس متوفره دايم فيها ٥ فرش ٢ للوجه و٣ للعين 
بصراحه فرش الوجه من هالمجموعه مااستخدمتها كثير بس ماحسيت فيها شي مميز مع انو وحده منهم ماخذه جائزه
وماادري ايش بس عن نفسي مااستخدمتهم الا للبلاشر او البرونزر امكن لهم استخدامات ثانيه ماادري ماجربت .
فرش العين من هالمجموعه خورافيه♥ حلوين شعرهم ناعم ومنفوش والفرشه المشطوفه بهالمجموعه بطله جدااا
بعكس اللي بمجموعه العين نحيفه وصغيره استخدمها للحواجب تعطي نتيجه حلوه ومناسبتني بس ماهي افضل من حق سيجما .

الفرش اللي تشتريها بالحبه منفصله عندي منها من فوق فرشه البلاشر / الستبينلج / الفاونديشين
فرشه البلاشر جداا جميله وناسبتني احب اخذ البلاشر بطرف راسها المدبب وبعدين احطه وبعدها ادمجه بكامل الفرشه
توزع البلاشر بشكل ناعم وطبيعي وماتتعب بالدمج بسبب شعراتها الناعمه الخفيفه .
الستبيلنج جدا بطله للمنتجات السائله والكريميه اوزع فيها البي بي كريم لاانه مايحتاج هذاك الدمج فهي مناسبه وللبلاشر
الكريمي حلوه علشان تاخذ كميه معقوله وبنعومتها توزع بشكل طبيعي .
اخر وحده تبع الفاونديشن زي ماقولت مااحب هالنوع من الفرش اللي يجي شعرها بلاستيك احسها متعبه تخطط بسبب
شعراتها فتحتاجي وقت لين تدمجي كويس وتروح الخطوط ماحبيتها ابدا .

فرش ريل تكنيك متوفره بموقع درج ستور او اي هيرب وكمان بالمتاجر بالانستجرام .. وحطي ببالك مو لازم تكون الفرش
شي غالي علشان تطلعي بميك اب وااو لها دور بس الاهم يدك ومسكتك لها والطريقه حاولي تشوفي فيديوهات تعليم الميك اب
وركزي بكيف يحركو كل فرشه وحاولي تطبقي وتتدربي دايم مع الوقت راح تاخذ يدك  الحركه وتشوفي كيف النتيجه فررق !! 

ان شاء الله استفدتو من البوست .. وكالعاده احبكم جميلاتي 



هناك 24 تعليقًا :

  1. ايوة فرش ريل تيكنيك مره جميله ومريحه في الاستخدام
    شطرا ع الطرح الجميل :)

    ردحذف
  2. شكرا مرا استفدت من هالبوست وكمان جاء بوقتو مع السهر والطفش استفدنا شويا
    ونبهتيني على شي مهم اني اتفرج كيف مسكه الفرشه واستعمالها بما اني مبتدئه فاحس هالشيء بيساعدني كثير
    وحبيت سعرها يعني بحكم اني مبتدئه حجرب منهم، شكرًا

    ردحذف
  3. مررره استفدت بصراحه لما تقولين شي ع طول اشتريه من دون تردد كنت محتاره من الفرش شكرا اميره 💗💗

    ردحذف
  4. شكررا ياجميله فعلا مفييد البوست 😍

    ردحذف
  5. يعطيج العافيه شكراً ممره أستفدت ححيل الحين اخذ الفرش وانا مطمئنه

    ردحذف
  6. أنا جربت فرش عاديه وسيقما للفونديشن والباقي كله أخذته من ريل تيكنيك حبيتها جداً عمليه وسهله وتنظيفها سهل وفعلاً ما طاحت منها ولا شعره بس حابه أشتري زياده منها قريباً وشكراً لطرحك حبيت التفاصييل الدقيقه في شرحك يعطيك العافيه 🌹😘

    ردحذف
  7. يعطيك العافية دائما تبذلين مجهود في كل شئ .. و فعلا يبان مجهودك و يطلع كل شئ 👍👍😍 ما شاء الله

    ردحذف
  8. مرره ممتازه جربتها

    ردحذف
  9. 💜انا كمان استخدمها مره جميله 💜شكرا ع الطرح اموره الاموره💜💜💅

    ردحذف
  10. شكررررا مرررة امورة 😘
    ممكن تتكلمي ع فرش ايلف سعرهم مررررة رخيصص بس في مدح عليهم يعني اذا ممكن تتكلمي عنهم ☺️
    و البوست روووعة 😭💙
    تسلم الايادي 💙
    وبس سلام

    ردحذف
  11. بوست جميل ❤️❤️ جربت كل المجموعات تبع الوجه بيرفكت ومجموعه العين ماحبيت الانجلت برش سيئه 😢 اما الباقي رووووعه
    المجموعه الفضيه توني شريتها وحبيتها واستفدت اكثر شي من الفرشه الكبيرة اللي نصها ابيض بالنص استخدمها للبرايمير ❤️ عموما مجموعات ريل تكنيك جوووده وشعرها ثابت وتدمج وتوزع بطريقه روعه والاحلى سعرها 😉 اللي في متناول الكل
    شكرًا أميرة 🌹

    ردحذف
  12. مرا حبتها من زمان وابغى اجربها واشتريها من متجرك بس خايفه تقوليلي غلقت 💔😂

    ردحذف
  13. 👌🏻ع الجرح البوست تبعك كنت محتارة اشتريها او لا 😁❤️❤️❤️

    ردحذف
  14. أحب أميره وبوستات أميره ()
    اتفق معك فرش ريل تكنيك من افضل الفرش وخاصه فرشة الفاونديشن اسمها expert face brush تنباع لحالها مو مع مجموعة الفيس برشز
    استغربت ما صورتيها .. مره بطله لتوزيع الفاونديشن
    ما جربت سيقما بس ودي اجرب الكابوكي برش احس اهم شيء فرش الفاونديشن بالميك اب

    دمتي سعيده :)

    ردحذف
  15. ماتكلمتي عن فرش ريل تكنيك حقت الكنتور كان ودي اشوف رائك قبل لا اشتريها

    ردحذف
  16. ماتكلمتي عن فرش ريل تكنيك حقت الكنتور كان ودي اشوف رائك قبل لا اشتريها

    ردحذف
  17. انا زيك مرره حبيت البفينق برش وفرشة البلش الكبيره بطلله
    وفرشة الشدو بعد💘💘

    ردحذف
  18. يااخي احب المدونات اللي زي كذا
    يجيبولك الزبدة ب سطرين
    مو اللي تكتبلك كتاب ماشاء الله ولا افهم شي
    حبييت هلباا ❤️

    ردحذف
  19. فرش ريل تكنييك منجد جودتها عاليه مقارنه بسعرها
    يعطيك الف عافيه عالبوست وشرحك الي بالمختصر المفيد 🌷❤️

    ردحذف
  20. فعلا جميلةةة خصوصا البفنق برش جميلةة بشكل قميل ❤️

    ردحذف
  21. عندي مجموعة الوجه من ريل تكنيك وكمان البودرة والبلاشر ومرررررا حلوين ولا فكرت اجرب غيرهم حالياً
    وكمان المجموعة الصغنونة حقتهم تنفع للسفر او للشنطة
    ، وناوية على مجموعة العيون إن شاء الله

    ردحذف
  22. ما أشتريتهم الا لمن شفت مدحك عليها ومدح الكثير عليها وبصراحة ألوانها تجذب كثيير أخذت المجموعتين للوجه والعين وأبغا أجرب غيرهم ,, جد فرش بطله وجميله ,, يعطيك العافيه

    ردحذف
  23. لاهنتي ابي اسامي تاجرات مضمونه لبيع الفرش

    ردحذف

Back to Top