الجمعة، 24 أكتوبر 2014

منتجات خلصتها هل ارجع اشتريها ؟؟ #٢

السلام عليكم ورحمه الله وبركاته 
نكمل بسلسله منتجات استخدمتها وخلصتها برقم ٢ .. المنتجات كثيره فراح اكتب ريفيو صغير عن كل منتج 


نبدا بمرطبات الجسم 
من اليمين لاينو بزيت الزيتون .. مرطب للجسم والاحماض الدهنيه الاساسيه ومكتوب انو ترطيب ٧٤ بالميه بعد ٨ ساعات
راي فيه ترطيبه عالي جدا جدا هوا يستخدم للحالات شديده الجفاف واللي عندهم اكزيما مثلا ، انا استخدمتو بفتره الشتا
عارفين كيف يسير جفاف قووي بالرياض كان جداا بطل معايا استخدمو مرا باليوم بعد الشور ترطيبو يبقى طول اليوم
ريحتو زيت زيتون مقبوله بالنسبه ليا ومع البودي سبري وكذا تختفي الريحه تقريبا .. من المنتجات اللي اتوقع راح ارجع
اشتريها بس بفتره الشتا مااحتاج ترطيبه العالي بالصيف .. موجود بااغلب الصيدليات عيبه سعره ١٤٠ تقريبا :$

بيوديرمات بي بي هوا مرطب للبشره شديده الجفاف اول مااستخدمتو حبيتوو ترطيبه عالي بس مو زي لاينو يعني تحتاجي باليوم مرتين لو انتي بمنطقه جافه احب فيه مع الاستخدام الدايم والمنتظم اعطى بشرتي زي اللمعه 
بس مااتوقع ارجع اشتري بالذات انا كنت ماخذه كميه من باريس والسعر هنا دبل الدبل !! مايستاهل على سعره هنا !

بودي لوشن من باث اند بودي من مجموعه سن المجموعه اللي تكلمت عنها بمفضلاتي حبيت ريحتها مرا وخلصتو بسرعه
عارفين هالمرطبات ترطيبها خفيف لنا بالرياض عن نفسي ممكن ٥ ساعات ويختفي مفعولها بس لمى اطلع جده استخدمها
بعد الشاور ويبقى طول اليوم !!
المهم هالبودي لوشن من باث اند بودي ولا فيكتوريا اللي تيجي معطره ضروري استخدمها لريحتها الجميله بس اما كترطيب انسي !

اخر واحد من دوف للامانه مااستخدمتو لوحدو فما اقدر احكم عليه من استخدمت زيت الافوكادو وانا اخلطه مع اي بودي
لوشن ويبقى ترطيب طول اليوم بس ريحتو عاديه فماراح ارجع اشتريه .

اشياء من فيكتوريا سيكرت زي ماقولت قبل كترطيب بالرياض راح يكون خفيف بس بااماكن رطبه بيكون جيد 
من اليمين بودي سبراي فانيلا لايس .. اووول مرا بحياتي مااحب شي بريحه الفانيلا !! اصلا انا اكتشفت احب الكوكانت
مو الفانيلا وهالمنتج خلاني اعرف هالشي ! البودي سبراي ريحتو فانيلا فانيلا حق حليب النيدو :| ههههههه
ماحبيتها ابدا ويارب لك الحمد انو انكب من نفسو وخلص هههههههه .

الثاني مرطب الجسم من مجموعه امبر رومانس جمييله المجموعه ريحه عنبر ناعمه بس حسيت اني مليت منها بعد فتره :$

الثالث مرطب من مجموعه الكوكانت باشن حلوه الريحه ماعليها بس مستحيل اشتريها :$

عموما حبيت المجموعات الصغيره من فيكتوريا سيكرت تخليك تجربي كم شي وبنفس الوقت تبدلي كل فتره واذا شي 
عجبك مرا تجيبي منو الحجم الكبير :)

معجون كولجايت اوبتيك وايت .. مكتوب درجه بياض وحده بااسبوع واحد !
عن نفسي مالاحظت اي بياض وماحبيتو كمعجون من ناحيه تنظيف وكذا  في حراره غبيه :$ حتى سلطان ماحبو
والعاده استخدم ثري دي وايت من كريست يحبو ويبلعو هههههه .

كريمات لليد من اليمين من باث اند بودي جميل كترطيب يدوم تقريبا ٣ ساعات معايا حلو للشنطه بالذات لو بتروحي 
وبتسلمي لاانو يعطي نوعمه عاليه بنفس اللحظه ..راح ارجع اشتري وبالذات بالتخفيض يسير ب ١٠ ريال !

اليسار مرطب لليد من لوكستيان ترطيبه حلو وريحته هاديه قريب من النيفيا ولا يتهيآلي ؟ :$ جيد ممكن ارجع اشتري .

ديودرنت = مزيل عرق من لويس ويدمر "الكريمي" موجود بااغلب الصيدليات سعرو حدود ال ٦٥
من اربع سنين استخدمو ولا افكر اغيرو واتوقع كان موجود بالمنتجات اللي خلصتها الاولى وبيكون في كل منتجات
 خلصتها بصراحه انا كنت اعاني من الحساسيه والحبوب وبهذله بس مع لويس ويدمر مرا ارررتحت بطل 
 بس قبل فتره بنت حذرتني منو وخوفت فقررت اخلي لو بخرج برا البيت وبالبيت استخدم شي خفيف جبت ليدي سبيد ستيك كنت 
استخدمو اول جيد نوعا ما المهم شوفت مقطع انو المنتجات المسرطنه !!! واصلا سىء :$ فبليز اللي تستخدم شي
كويس ولو طبيعي ياريت تدلني .

غسول للوجه من نيتروجينا بالجريب فروت مقشر للحبوب من الصيدليه ناسيه سعرو :$
للامانه ماعندي حبوب فماادري اذا بجد يقشرها بس مفعوله مع البشره عامه كان عادي مااذكر سوا شي وبعدين انكب
عليا فمااقدر احكم عليه بس ماراح ارجع اشتري .

كلين اون مي من سوب اند جلوري موجود بصيدليه بوتس 
اتوقع اغلبكم يفتكر الهوس اللي جاني فتره مع سوب اند جلوري للاسف هوس وصل لدرجه اني كرهت سوب اند جلوري !
هيا ريحتها حلووه بس انا ملييييت منها ومن ريحتها وسرت اشوفها ببوتس اديها السحبه هههههههه الغسول طفشت منو ولا خلص اخر شي خليتو صابون لليد واخيراا خلص !! نصيحه لو جبتي من سوب اند جلوري جيبي الاحجام الصغيره
ولاتكثري اخاف تملي زي :$

حبيبنا مزيل الميك اب من بيوديرما موجود بااغلب الصيدليات الكبيره 
هالمزيل كل مااستخدمت غيرو حسيت بقيمتو جمييل ولطيف تحسي بنظافه وانتي تستخدمي لاانو كاانك تنظفي وجهك
بمويا ! والاجمل لو كنتي مرا تعبانه عادي امسحي الميك اب ونامي :) فلتحيا المنتجات الكسلانيه ههههههه 
الاكيد راح ارجع اشتري بالذات استغلو وقت العروض اللي واحد وواحد مجانا ! حاليا جبت واحد من لوريال يقولو  
بديل عنو نجرب ونشوف :)

شامبو للشعر الدهني من ايف روشيه سعرو بحدود ال ٣٥
نزل بمفضلاتي وقبل يومين روحت اشتري ثاني مرا مخلص للاسف :"( الشامبو بطل عيبو ريحتو مو مرا بس كان مفعوله
جميل يخفف من دهون الفروه بس مايجفف باقي الشعر .. اتوقع لو وحده شعرها دهني مررا ممكن ماراح يكون جيد
مرا تحتاج شي اقوى .

غسول للوجه من كلارسونيك جا مع الفرشه اصلا حجم عينه 
استخدمتو كان عادي مافي شي مميز ! ماراح اشتري .

كريم بيو ريجينا المبيض من الصيدليه يناخذ بوصفه
من فتره طويله روحت لدكتور علي بغدادي تبع الجلديه علشان النمش وانا متحطمه العاده كلهم يقولو ماله علاج المهم
قالي الا وهذا علاجك استخدمي ٤ شهور واستخدمته امكن فتح النمش ٢٠ ل ٣٠ بالميه بس !! وقفته خوفت لاانو كريم
مبيض صعبه اطول عليه .. المهم حاليا افكر بعلاج النمش بالليزر مين جربتو ؟

زيت جوز الهند طلبتو من اي هيرب 
استخدمتو لشعري فتره مو باانتظام بصراحه ماشوفت فرق او شي بس احطو علشان احس اني اهتم بس ههههه
يعني افتكر براشوت كان افضل بس هذا يحمسني انو طبيعي ١٠٠ بالميه .. ماكملت نصو وانكب عليا "تقولو ايش البنت
هذي كل اشياءها تتكبكب ههههه ماادري كيف والله :$" المهم عندي علبه ثانيه واستخدمها الزيوت الطبيعيه المعروفه احس
اذا مافادت ان شاء الله ماتضر وكمان تقدري تستخدميها للجسم او الوجه .

ماسك المكاديميا ب ١٥٠ تقريبا من نزيه .
الماسك جدا بططل ترطيبه عالي احبو واحب ريحته مرا بس انتبهي تحطي ع الفروه والجذور لاانو يرطب مرا فراح يدهنها
لك ويين شعرك مزيت :$ انا استخدمو كبلسم كمان بالذات الايام اللي راح اسوي شعري فيها يعطي نعومه وريحه حلوه
اتوقع ارجع اشتري 

منتجات الميك اب وعطر
من اليمين مسكره فوليوم جلامور ماكس من بورجوا سعرها امكن بحدود ال ٦٠ .. كانت جميله جدا واتوقع نزلتها بمفضلاتي تكثف بس استخدامها يبغاله انتباه ولا بتحوسك :$ وازالتها متعبه نوعا ما .. عموما المسكره مهما كانت حلوه
غالبا اروح اشتري ثانيه ادور الافضل ونجرب الجديد ونسوي ريفيو عنها بالبلوج :)

بي بي كريم من سماش بوكس كتبت عنه ريفيو هنا المنتج كويس اتوقع لو كنت بالجامعه راح ارجع اشتري لااني بستخدمو
بشكل يومي بس بنفس الوقت احس في بديل له بسعر ارخص .. بس حاليا ماراح ارجع اشتري 

عطر جلامور من فيكتوريا سيكرت .. العطر جميل وحبيتو بس بعد فتره الغطا خرب وكان يهرب !! هالنوع من الغطا قبل
كان عندي عطرين نفسه من فيكتوريا سيكرت وكلهم نفس الشي يهرب فجآه الاقي نصو مخلص ! والشي الثاني اللي 
خلصو سلطان مرا يحبو يسعدو ههههه كان يوميا يستخدمو من نفسو  ماراح ارجع اشتري .

المنتجات ماخلصت بس انا تعبت :"( هههههه باقي منتجات لاش راح انزلها ببوست لوحدها ان شاء الله 
ان شاء الله استفدتو من البوست واشوفكم قريب 


هناك 26 تعليقًا :

  1. يسعدك ربي والله يعطيك العافيه ياعسل♡

    ردحذف
  2. كله بيتكب منك كده ههههههه ...تدويته جميلة تسلمى ع المجهود..بالنسبة لعطر جﻻمور ازاى بيهرب انا عندي تياس من فيكتوريا نفس طريقة الغطا لجﻻمور ازاى احافظ عليه طيب
    و كنت عايزه عطور اتنصحينى اجيبها كعروسه انا بحب ستايل عطور فيكتويا بس ثباتها مش مره ..

    ردحذف
    الردود
    1. ههههه شايفه كيف :$
      والله ماادري كيف بس كل كم يوم الاحظها تقل !
      عطور زي فيكتوريا روحي لمحلات العطور واطلبي عطور بريحه الورد والسويت والكاندي تلاقي اشياء تشبهلها
      ولو اني اشوف عطور فيكتوريا مميزه بس زي ماقولتي عيبها ثباتها موش ولابد :|

      حذف
    2. انتى ازاي جميله كده بجد ربنا يسعدك يا ميرا ليكى عندي حضن كبير اول ما ربنا يكتبلي واشوفك ان شاء الله

      حذف
  3. ماشاء الله عليك حبيت تجاربك وخصوصا شامبو حق ايف روشية لان هذا المحل الي ماافكر ادخله
    يعطيك العاففية

    ردحذف
    الردود
    1. ان شاء الله تحصلي لاانو دايم مخلص للاسف :$
      الله يعافيك يارب

      حذف
  4. One of the best deodorant I've been using is VICHY 48hr soothing anti-perspirant its free of everything I've been using it for one year and half and its the best
    www.iora34.com
    http://www.youtube.com/user/HebaHappiness

    ردحذف
    الردود
    1. i tried vichy once and i was like ummm like / hate i don't i think i will give it another chance thank you

      حذف
  5. أنا جربت النمش باليزر ولسا ماخلصت العلاج لان النمش تبعي سطحي بس الحمدلله أختفي بس لسا أثر الجرح موجود يخف مع الايام والمرهم لما يكون سطحي يختفي بس عملتلي تحليل مختبر عشان تتاكد ايش سببو والحل الوحيد هو الليزر الكريمات ماتسوي شي خسارة بس 👎

    ردحذف
    الردود

    1. حلو وين سويتي ؟ انا مااتوقع انو سطحي لاانو من سنين
      بس لو يخف بنسبه ٥٠ بالميه انا راضيه ومن جد الكريمات خساره وبس :)

      حذف
  6. النمش بيصر موضه عندنا صبري كم شهر
    متابعه لك يسلمووو ياجميله

    ردحذف
    الردود

    1. هههههههه اما يسير موضه !!
      والعفو يامتابعتي الجميله

      حذف
  7. ياقمر جربي ديودرنت ماركة بزلين مكوناته طبيعية وفيه منه بعطر او بدونه وكمان حابة اضيف انا جربت ماسك المكاديميا بس غالي أخذت بداله على مدح ميس بوتيك ماسك لوريال بزيت الاركان اعطاني نفس النتيجة ويمكن افضل وبسعر اقل..

    ردحذف
    الردود

    1. جربت بيزلين زمان ماحبيتو ابدا .. ونجرب لوريال ان شاء الله :)

      حذف
  8. اموره بالنسبه للديودرنت انا استعمل مسك عبدالصمد الابيض مره بطل ومن شهر جربت حاجه اسمها تراب مسك ابيض علبته رماديه مادري وين ممكن تحصليه اعطتني ياه بنت عمي كمان كويس جداا وللحين استخدمه وكمان قبل مسك استخدم المسك لوحده كنت اطحن شبه + قوالب مسك عبدالصمد جداا رائععه .. كلوو مسك في مسك :q بس جد اثبتلي انو افضل شي ما حسس المنطقه ولا قلب لونها الحمدلله

    ردحذف
    الردود

    1. والله فكره المسك والشبه احسها بطله وحلوه انها اشياء طبيعيه اكثر
      شكرا لك على ذكر تجربتك يعطيك العافيه يارب :)

      حذف
  9. مراا احب مدونتك صراحة ، شكرا لك ولجهودك

    بالنسبة لديودرنت احب بيز لاين( سعرو في حدودال ٥٠) من سنتين او ٣ ماشاء الله ما غيرتو

    ما اتحسست ولافي حبوب ولا اي شيء
    بس اغير الريحة ( واصلا هوا مررا ما كانو في ريحة خفيفة مهي مزعجة)

    جربيه من الصيدلايات وراح تدعي لي ان شاء الله. :))

    ردحذف
    الردود
    1. كانت ليا تجربه معاه زمان ماحبيتو :$

      حذف
  10. اتوقع سطحي لان اذا ولدتي وموجود معاكي ممكن يكون مو سطحي بس اذا من سنين سطحي انا نفس الشي من سنين موجود فيني سويتو عند عيادة الطب لليزر بجدة عند دكتوره هنادي حج 👍

    ردحذف
    الردود

    1. اها حمستيني ان شاء الله راح اسويها وشكرا لك

      حذف
  11. أنا أستخدم شبه مطحونة مع مكعبات مسك القرشي واخلطهم مع كريم دوف الوردي اخلطي على حسب ماتحبين ثقيل أو خفيف ومرة حلو أنا بشرتي حساسة ونفع معاي وحتى الريحة تبقى فتره طويله

    ردحذف
  12. بدون مجامله يعجبني النمش و الناس اللي فيها نمش احسهم جميلين 🚶🙊

    ردحذف
  13. ماسك المكاديميا للشعر من نزيه تكلمت عنه نهى نبيل ومن بعدها كتبوا عنه كثير بلوقرز
    بس ما شاء الله انت سابقتهم :)
    شكرا

    ردحذف
  14. انا استخدم مزيل الرائحة من بيزلين مررره مرتاحة معاه بس اللي خالي من العطور

    ردحذف

Back to Top